PU PHUT THANG (1765-1865)

PU PHUT THANG

(1765-1865)

Min        :   Phut Thang

Pa Min   :   Zong Dongh (Suante-LuahLangh)

Nu Min   :  Nem Awi      (Suanman-Suante)

Vangkhua:    1.  Kaalzang (1765 - 1845) ………….…………80

                     2.  Ciimnuai  (1845 - 1845)….. Khaal 1 sung……0

                     3.  Phaileng   (1845 - 1865) …………………..+ 20

                                                                                                 100

Zi Min     :   Dim Deih   (Thatmun)

Sungh pa :   Mun Ngiak (Thatmun)

Sungh nu :   Nem Son    (Suanman-Suante)

Tate Min:

1. Dongh On    +  Son Ngiak      (Kaalzang/Thatmun)…… Mualzawl/Lunmual
2. Tuah Vial     + 1. Goih Tel     (Kaalzang/Buansing) ….... Mualzawl/Lunmual

                              2. Nem Vung  (Kaalzang/Hatlangh) …........Mualzawl/Lunmual

3. Tuang Neng +  Huai Ngaih    (Kaalzang/Hatlangh) …… .Lunmual / Muizawl
4. Vum Luan    +  Khum Vung  (Kaalzang/Buansing) ……. Lunmual / Philnak
5. Awi Huai     +  Ngiak Son      (Kaalzang/Thatmun) …….Mualzawl/Lunmual

             Pu Suangphut’ tupa Phut Thang pen Pu Zong Dongh leh Pi Nem Awi (Suanman-Suante) te tapa hi a, 1765 kum pawl in Kaalzang khua ah suak hi. A khankhiatna Kaalzang khua mah ah nu-ngak Dim Deih (Thatmun Beh) tawh kiteeng in tapa 4 leh tanu 1 nei uh hi. A tate Dongh On, Tuah Vial, Tuang Neng, Vum Luan leh Awi Huai unauteng in Kaalzang khuasuak vive a hi uh hi.

             AD1845 kiim pawl in Kaalzang khuabup meikang aa, neih leh lamh khempeuh Meikuang sung ah tung khin ( Vut & Vai suak khinta!) ahihman-in nuntakzondaan kibulpat kik kul a, tua bang tuahsiat kawmkaal ah akihuhzo zawsawnding omlo dinmun atunciang un: Pu Phut Thang in thukhat  na-phuangkhia aa, Sanggamte aw, “Tuanpupate siktuidawn ngei Itna damtui aphuulna mun Ciimnuai ah Tuidim kik ni, A ut khempeuh in hongzui phot dih un, nuamsakik tapeuh hen hong cih leh nuamsakik veve ni”  acihteh Sanggam u-leh-nauteng, amakpa Ngiak Son Innkuan, Suante Beh sung pan leh Beh sdang pan Sanggamte pawl khat mah in zong hoih sa in a kithawipah teng in a Lobuk tek vua vaimin sump omlai sun teng leh Kungmui tung aa, Bepite kaikhawm mengmeng in Ciimnuai ah Tuidim di’n na paipah uh hi.

               Cimnuai atun ciang un Pu Phut Thang in Umpi dim khat in tuidim masa phot a, Siampu nasep pawl khat sem in phuisam kipan ding in Tuanpupate min atheihlaiteng leh asiam abiak min a theih teng lo in, suangphuh gei aa, Zubeel neu khat sung ah zukoih hi. Umpi sung a tui a leihkhit teh phuisam(Thungetna) kipan a, amanciang in Tualkiim aa tudiimdiam teng (Kaalzang pan aa paikhawmte) tuiphihna  a man mateng daikhipkhep in om uh a, tua zom ah Suangthu 3 phut in meitawh aa, meihoih tak akuan theih ciang in lungdam uh, kici hi. Sep leh bawl khempeuh a man tak ciang in Um sung aa zuha apuak ciat uh leh Pu Phut Thang in Umpi dim tak tui adip tawh meh uh a, tua tui abeiciang in amau aa’ ding ciat dimtawm pan uh hi. Tua zan pan in giahphual sat in na giaksuak pah uh a, tawl khat sung Ciimnuai pansan in na khuasa phot uh hi.

              Ciimnuai ah khal 1 aomkhitciang-un Kaalzang khua zuat kik ding geel uh a, ahizong in Phaileng khua a tung masate in ciah kei un la, Phaileng ah hong teeng un, cin na kho uh hi. Tua laitak mah in Suante Beh sung pan pawl khat hong tung thuah leuleu uh ahihman-in Kaalzang zuat kik di leh Phaileng ah lut di vai kamkupna hong neih theih uh ciang in Phaileeng pan Sanggamte hong khohna mangphot dih ni cin ki thukim uh ahih man in Phaileng khua ah Kum sawtpi sung mah teeng khawm leuleu uh hi. Tuni dong mah in Pu Suangzong’ tute sung pan pawl khat teeng suak lai uh hi.

              Phaileng khua ah a kiteen hun sung in Pu Phut Thang makaihna tawh Ciimnuai kiim teng ah lo kizuan kik a, Buk hoih tak lam in Inn bang in giahtheihna ding in a bawl zeel uh hi. Hun khat ciang in Kaalzang zuan kik lo veve, Ciimnuai khua zuankik leng a cih leh pawl ngah pah bilbel aa, tu lai taka a Tuinaak kician omna mun Ciimnuai khualui mun pan Phaileeng lampang a Lozuatna mun uh ah Buk limtak lam in teensuaknadi zahdong in abawlngeikhin uh ahihi.  Tua mun pen khua mun hoih khat suak thei ding hinapi’n gankhawk leh logam hoih deihna tawh akhuadak uh ciang in tu laitak Lunmual gamsung teng pen hoih sa mahmah uh a, sabeng ding leh gamveel ding in akuan zeelzeel khit uh ciang in anuai aa ombang in Pu Phut Thang in la na phuak hi.

1.a. Et lawm Mualkuam, Sang  savaina,

       A sing zatam paallun sang ee,

   b. A sing zatam paallun sang ee,

       Kuam bang luah leng, Vangkhua sat leng,

       Lumsuang phuhbang kho leng ee.

2. a. Ngilhmawh Kaaltui Vangkhua nusia’ng ee,

        Tuanpupate siktui dawnkai zuan ung ee,

     b.Sian leh ziin aw meelma lo aw,

        Minza Taangza aii-din hongsiam aw,

     c.Tangbangdam din hong siam aw,

        Tanbangkim diin hong siam in.

         A tung aa Pu Phut Thang laphuahte ih muh mah bang in Lunmual(Mualzawl) gam teng ah gamveel in apai lai un akluisan aken uh pen Phaileeng khua sang in khuangbaihzaw ban ah aktui ai asaan sim un Phaileng khua sang in aipha zaw ahihman in lungkim mahmah uh hi.

                

          Hun khat lai in Kaalzangte minthang mahmahngei napi’n Pu Khan Thuam hong khan ciang in Phaileng, Kaalzang, Vangteh leh Tedim gamsung khua tuamtuam in zong Mualbem ah siah kipuak ta hi. Ahizong in Pu Phut Thang pen Saizang Innpite tawh zawl in na kiman theilaibuang uh ahihman in zu kiluup in sa kigawh uh a, Ciimnuai ah teenkikding a ut hang un lokhawhna leh gankhawk ding deihna tawh gamthak mun kicing zaw ah khuasatnopna thu pen Saizang Innpite: Pu Gawh Pau leh Pu Thuam Thawng in Pu Phut Thang deihna na theihpih uh hi. Tua tham lo in Nopni, Dahnite ah zong kitheisak in na ki-uap tangtang uh hi. Ahang khat om a, Saizang Innpite in a thuneihna uh uangzatlo, kiphasaklua selo in gualhuai uh a, gamsung mipite in ahaksatnate uh akoh ciang un lungduaitak in thukigente ngaihsak zo in panpihsiamding lamsang kinzaw uh ahihman-in khuakiim khuapaamte pahtaakna a ngah laitak uh hi-a, Phaileng pan Pu Phut Thangte Innkuan leh amak-pa Pu Ngiak Son tawh zong akimai-ngap uh cih bang himawkmawk lo-in nung leh ma thusim-thulangh akigen ngam uh a hihi.

         Tua hun in Pu Phut Thang’ tu angpom ‘Pau Vial’ kici tangval pen Phaileng khua Pu Ngiak Son (Thatmun) leh Pi Awi Huai (Suante)’te tapa neihsun hi a, asihvat mawk teh gamhluah ding vai lunghihmawhna lianpi hong nei pah uh hi.  Zongeina ah gamhluah ding pen amau Beh sung ciat pan thuvaihawm ding hilel napi, Pu Ngiak Son in sanggam pasal neilo a, apu sawn khang 4na dong pan pasal 1 bek piangsuksuk uh ahihman-in a beh aphung anai pen Khuasak khawng ah om uh hi. Tua hi-a, Pu Ngiakson leh azi Pi Awihuai in tapa deih mahmah in tapa ngah theih dan ding lampi azon uh ciang in Pu Thuam Thawng in Muizawl (Pu Pau Khen’ huam sung?) khua ah  Kawpu kici khat om hi acih teh va kimu uh a, amau lungkimna apiak khit ciang un ciahpih pah uh hi. Pu Ngiak Son in a tapa Pau Vial min tapsak in Vial Thual phuak in

Tapa ding in a nei pah uh hi. Amah pen gamvak kizen mahmah, Thaangsiah kiva, samat, sakap siam khat hong suak a, Lunmual a tun khit ciang na leng in Vial Thual in salu tawh a Innzeem na kici ngei liang zen hi.

          Hih bang hun sung mah in Pu Phut Thang leh Pu Ngiak Sonte Sunghta-Putu pen Saizang Innpite kiang ah ahawhsialsial un a nasemte lak ah Bena kici mipilvang khat om a, Innpi nu: Pi Kho Vung’ sawl bangbang in lenglate neek leh dawn ding a bawlsak samsam den, amitheek hoih mikhat Pu Ngiak Son in a muh teh na paakta hi.

          A ciahlam un asunghpa kiang ah gen in na kikum pha kik uh a, Inn atunciang un Pu Ngiak Son in azi Awi Huai (Pu Phut Thang’ tanu) kiang ah agenteh “Innpite in aphal ding uh leh tapa 2na di’n ngen in amau lungkimna piak din hong kithukim pah uh hi.” Hih bang teng tawh kithawikik-in Pu Phut Thang in thupiang teng agenteh Pu Thuam Thawngte Innkuan zong kamkumpah uha, Phalna Kammal akizakciang in Lungdam uh a, Gankhawk aa agankepteng uh hawlsak pah vingveng in zu leh sa tawh kuanpah uh hi.

               Tua hun pan Bena pen “Suahtakna ngah bek hilo in Thatmun Beh Tapaza ngah

      Pa” hita-a, Lungdamlua in khitui-naptui tawh kipom uh a, Pu Ngiak Son leh Pi Awi

      Huaite tapa suak bek thamlo-in a tanu uh Vung Uap tawh kiteeng sak pahlian in,

      Pu Ngiak Son in Kaalzang khua Suante Beh tawh kizopna pan akensuk uh nauzaw 

      Innluah azuihsak ban ah ‘Thatmun Beh Pu Ngiak Son’ Gamhluahpa Bena’ asuak hi.         

      

          Pu Phut Thang pen a teek hang in Ciimnuai ah om mun zaw a, Inn bang aa giahtheihna Lo Buk hoih nei ahihman-in ama’ ut zawk in Ciimnuai ah na om zaw hi.

A hang tuamtuam a-omphial zong tua mun pen Pi Dim Deih in hong nusiatna mun, akikholhna uh atamzaw lolai khawng ahihman zong hikha thei ding in ki um hi.

          C.1865 AD in Pu Phut Thang teeksih a, Ciimnuai hong tunpih kik pa leh Phaileng ah aki-teen hang Ciimnuai abulphuhdiak pa, Ciimnuai kiimteng ah asihdong mah akimu mun pen Ciimnuai Itpa: “Ciimnuai aa mi Phut Thang hi ciaih!” cin amah a-it khanghamte’n minsial leituan in sihthau na lot ciat uh hi. Sih Thau lot ging leh Sukte Beh Pau Kam (Phaileng khua uk ding pa)’ koih Zaam tumging aza peuhmah in khuakiim-khuapaam pan zong sigaldin na pai ciat uh kici hi. Laangkhiat Sihvui hun in Innpipa Pu Thuam Thawng minsial na kammal anuai aa bang in kiciamteh hi.

“Heih! Pa Shang, Ngalliam Pasal Nang hi ciaih!

  Na ut na ngam na luah man loh hang, Ngaih khua leng ing hi ciaih!” cih bang in 

  Zawl muanhuai khat hihna tawh Sigaal bek hi lo, Thaulot in na minsial ahihna thu   

  khangmasate ciaptehna ahihi.

  NB: Pu Phut Thang’ Tangthu pen Khangluite ciaptehna pan akitomlaak  hi.