PHUT THANG NET

PHUT THANG NET

http://phutthangnet.blogspot.com

                                                                    PHUT THANG NET  Vol. I, No. 1, January-December, 2012

                  Pu Phut Thang' Tute Thukizakna Phut Thang Net pen sawtpi pel pn Pasian hong piaksa hi a, Mun tuamtuam ah ih om hang Unau Sanggam sungsuak khat ihihna pen gensawm takei leng zong ihsung Mi'n hong pulaal zeel a, immcip in kitheihmawhbawl zawhding ahi kei hi.  Suante Beh Luahlangh Baawng sung pan Pu Thukzom' Tapa Kimzong leh NgaihTuang ki-a, Pu Kimzong' Tapa Suangphut,  Pu Suangphut' Tapa Khumtawn leh ZongDongh, Pu ZongDongh' tapa Pu PhutThang hi-a, "Suangphut' Tupa Phut Thang" in Kaalzamg Khua ateen laikhawng un kithei deuh hi.

                  Kaalzang khua beikuan {Meikang in Khuabup Kisia} in Pu Phut Thang in a suan leh khakte a khansuah na ding in geelna lianpi khat hong nei aa, Ciimnuai ah Tuanpupate (Pu Khupmu, Suante, Henkai) siktui dawnngei dipkik ding lunggulhna tawh Kaalzang pan avaihawm a zuinuam teng tawh na lalkhiapah in Ciimnuai na zuankik phot in Tuidipna (Upna: Zongeina ahi Biakna tawh Kisai Thupi) aneih khit takciang un Ciimnuai tawh kinai pen Phaileeng Khua na zuansuan phot ta dih uh hi. Tua Hun lai khawng in Sukte Beh Pu KhanThuamte Innkuan in Zogam hong ukta uh a, Phileeng pen Pau Kam khua ding in ageelsa uh kici hi.
Phaileeng khua ah Tuanpupate Kumtampi sung mah na teeng ngei uh a,Hun khat ciang in Pu Phut Thang in a lunggulhden ahi, Ciimnuai khua munlui kiim teng ah a Ta-atu teng tawh lokho in an na hau mahmah ngei uh hi. Pu Phut Thang in Ciimnuai kiim aa alomun uh ah teen toh suak ding ut aa, amakpa ngiakson leh khuapihte pawl khat zong a ut uh hi. Ahizong in lokhawhna ding leh Sialkhawk Gankep theih na ding ngaisutna tawh mundang Gamthak sat ding na geelpha kik uh hi.

             AD 1869/1870 (1834 in Khuakisat acizong om?)ciang in Phaileeng pansan in Mualzawl Khua na sat uh a, Kumsawtpi amh akiteen khit 1893 March....? in Mikang Kumpi Galkapte in Hausapa Pu Bena hong matsak ban phasak nailo in Khuabup Mei tawh hong halkhap sak ciang in Kangkan, Tuimu leh Vomkuate ah Refugee Camp akilut ciat na pan AD.1896 kiim pawl in Lunmual Khua ah na kikaikhawm kik ciat uh aa, Tuni dong in kiteengsual in Khuakip suak hi. NB: Hausapa hong suahtaak ciang in Mualzawl khua ah Inn na om nawnlo ban ah Mualzawl ah teenkik ding vai hawmna omzo nawn lo ahih man in Mualzawl khua bei ta aa, Pu Bena zong Lunmual Hausapa mah in om suak in Lunmual Khua ah zong Beh 7 teng mah tawh Unau Sanggm khat in nuamkhawm, dahkhawm liailiai uh hi.

             Lunmual khua pan Piantit pai 5 te hong ciah zawh asawt lo 1920 Kum in Philnak Khuasat hun in tam kilal khia pen aa, Pawl khatte hong ciah kik in Pawl khat pen Tuilangh, Khua Bem, Zampi, Muizawl cih te ah ahunzui-in na lalkhia lai uh hi. Khangthak hun ah Tedim(1945/1953), Tahan, Kawlpi, Sawbua, Khampat, Tamu, Yangon khawng ah kiteeng aa, AD Kum 2000 khit ciang in Gamdang paite bang a tuntunna gam uh ah teeng suak thei ta uh hi.

            Pu Phut Thang' Tute Thukizakna Phut Thang Net i cih ciang in kuamah deidannopna tawh kigeel hilo na pi'n atelzonailo vevete theih ding in : Pu PhutThang'Tute Nuntak Haksatman in Khua tuamtuam ah aom uh hang, Nop Ni, Dah Ni te ah Mual leh Guam, Guunpi-Ciaup[i kaantan in Thukizasak in nakiphathei diamdiam, Khang masate in Sun Nitangtum-Nitha beiliang mah in na kipha ciatciat uh ahihman in Khangthak hun ah PHUTTHANGNET icih pen athakphuan zong hisese lo in Tuanpupate mapatsa maban azomte hibek hang aa, Lainasepna pen E-mail leh Internet zang in azomtosuaknuam hizaw cih ih kitheisaknuam hi.                                                                                                     Itna tawh Laigelh: Joshua Thang

Bible Speak Today: " Kei deih Antanna pen hihbang ahihi. Gitlohna khaute phel in, Hakkol Savun khaute phel aa, akinengniam mite khahkhia in Hakkol khempeuh suktan ding ahihi. Na an uh agilkialte tawh nekhawm in, Inn neilo mizawngte abukna ding uh vaihawmsak in, tangguak a om mi na muh uh ciang in puansilh sak a, na mipihte kiang pan un buloding hilo na hi uh hiam?"                                        _Isaiah 58:6-7

CHILDREN WORLD: Pu Phut Thang' Tute sung ah Naupangte dinmun pen bang dinmun ah om lian hiam cih Leitung bup Naupangte dinmun tawh khinkhai leng gendanding ngihsut hak mahmah lai hi. Naupangnote pen limtak pantah thei hi zen leng Khangthak Makai dingte vive ahi uh hi. Khangthak momno ten zong Nu leh Pa leh Sanggmte hong deihsaknate phawksiam, Thupi ngaihsut ciat ni. Tu laitak Naupangno na hih uh hang un Hun khat teh Makai Hoih, Sia/Syamah Hoih hong suak ding hi uh teh. Sangkah lai buang in Kai hanciam tek un. Maban khat peuh ah zong Hanciam tek un. Gualzawh-Lawhcin-Daupaina na mai ah om gige hi.

Developing People Group: A khangtonuam Mipawlte khempeuh in Pilsinna bulphuh in khangto uh ahihman in Tuni Khangnote'n Haksa ta leh Sangkah in Hanciam teta phot dih ni. Tua in Kahlei hoih pen khat hi thei hi. A gualzote pen a lungkia ngeilote hi lo in alungkiatna mun uh ah akhawlsuak ngeilote hizaw uh hi. Naupang na hizong in "Nampi Lungsim" na neithei hi. Nampi Lungsimneite a tamzaw in Ngiimna, Tupna kician nei uh a, a tangtun mateng hanciam in lawhcin sawm hamtang zaw uh hi. Haksatna, Lungkiatna atuah uh ciang khawllo in phu teitei uh a, atawpna ah lawhcing takpi lel uh hi. Nang ee, Na ngiimna, Na Tupna bang hiam?
                Sanggam aw, Haksatna na tuahciang in Gualzawh sawm in Kung na tun dong na taisawm hiam? Kumpi sangkh kitawmlua lai aa, Bikna Sangkahte pen AAS, UMAS leh MUAS ban ah Pune leh Bangalore  ah Lai Siangtho Sangkah tawm ki-om lei samna ven, Sangkah kitawmlua mahmah lai mawk hi ei, Guai... .Government College khat pepeuh ah Sangkah kiomzo nai meello aih teh Tata, tute, Sanggmte tha kipia ni. Sangkah thei laitak hun paammaihlua hi. Hong hanciam ding in Khangthak momnote hong ki lam en mahmah ta hi. Heih! Mite'n Oxford University khawng ah Admission la ziahziah ta uh hi veen,.... Ei kiang aa om Sangkah theihna pepeuh ah ei zong,... ..... .... aban pen Nang hong zom dih oo, Sanggam!!!

Family Health Care:  Mimal cidamna leh Innkuan Cidamna pen Thupi mahmah hi. Cidamna in Pasin hong piak khong hauhna Thupha lianpen khat hi pah lian hi. Damtheihnading in Kikeptheihna, Neek le dawn Siangtho, Teenna mun cihte Thupi mahmah hi. Vitamin om ante neekna in Zatui, Zatang neekna sang in Thupi zaw lai hi. Hunthak nuntakzite kn in la, Zato Pilna Laibute zong sim zeel in. Mikang Paunak khat ah " Prevention is Better than Cure" akicih mh bang in Cidamna ding kikepna pen Thupi ngaihsut pha mahmah in. Nuntakna tktk pen Pasian khut sung ah om cih phawk gige kawm sa in mainawt ni maw.

Global Phut Thang News:
1. Pa ThangTanSai leh Nu Ciin NgaihMang te'n Tanu Hausian Ithuai, Pa DoSianKhai leh Nu CingLamLun ten tapa Mangsian Lenkip hong nei uh a, asuahphet un US Citizenship ngah pah uh cih theih ahih man un Phut Thang net pan ki lungdampih hi.

2. Monei: Lunmual khua Pa Thuamkhanlam leh Nu DimlengHoih in a tapa Thang Tungnung' zi ding in Lia CingSianLun pen Lunmual khua Tangpua Beh Pa .................................. leh Nu ......................Inn pan mopi cih thu hong kipuak ahih man in ki lungdampih hi.

3. Mopia in Monei: Lunmual khua Suante Beh ahi; Pa Thangzasuang tanu  Lia Nuamta pen Suante Beh mah ahi Pa Daidolian in a tapa Damtuanthang' zi ding in mopi ahih man in SUANTE BEH in Mopia khia napin Moneite mah suak vevehi.

4. TTWF makaih siamna tawh Tedim ah Khuado pawi kibawl hun in Tedim aa Sangkahte Pu PhutThang' Tute sung pan Letsong sang pawl khat hong om uh ahih man in Phut Thang Net pan ki lungdampih hi. 5. Lunmual Khua in cik mah hun aa kiza ngeinailo Ohsuh ngah cih thu hong ging aa ki lungdam mahmah hi. Tedim, Tonzang gam Ohsuh kipia thak 25 te sung ah Lunmual kihel in Phaileng leh Tuilangh ten zong ngah uh cih kiza ahihman in Lungdamna lian hi. Hih thu hang in a ihmulo liang aa lungdam pawl zong ki om aa, Dec 2 in Lunmual ZBCM Biak inn ah Advent Christmas Thungetna kinei aa, Laigelhpa Joshua Thang leh Sanggampa Nginthansang {4D} tawh va kihel in Hausapa akipan Pastor pawl khat hong kihel thei aa, Khuamite zong lungdam in Pasian tung ah Lungdamna kiko khawm aa,... Gamsung gampua aa om Zomite aadin zong Thungetsakna kinei lai hi. Tua Thungetna hun ah Tedim pan Sia Cinkhenkham {BBC ah Sangsia} zong hong kihel in ki lungdam khawm hi.

Dahpihna: 2011 September11 in Pu Phut Thang' Tupa Ngalliam khat ahi Pu Sianzathang, Lunmual in hong nusia a, 2012 October Khuado Hun laitak in Pu Phut Thang' tupa muanhuai khat mah ahi Tuilangh khua pan Pu Khandal in hong nusia uh ahih man un dahpihna kiciamteh hi. 

  E = ETLAWM MUALKUAM, ZOGAM NUAM. G = GAM AA’DING NASEM DING.

Contact  E-mail: phutthangnet@gmail.com,   http://phutthangnet.blogspot.com

Notes: Vol. I, Issues No. 2 pen Khaguk hal in bawlkik leng June 2013 ma in kingahthei ding, Laigelhnop na neih uh leh hongpuak baihthei le uhcin Ariticle hong kisuaksak theipah ding hi.

LUNMUAL THUKIZAKNA

L  U  N  M  U  A  L  N  E  T

(LunmualThukizakna: http://lunmual.blog.com )

                                                                 Est. 2013, May Day                       …………………………….

Vol. I, Issues No. 1                        Motto: “Work Together, Gain Together”                                 May 1^st, 2013

Lai Siangtho bulphuh: Tuaciang in adik ka Pasian in kei hong ompihna leh Kumpipa in kei tung ah hong gen thute zong amaute tung ah ka gen hi. Tuaciang in amaute in “Tu in nasep kipanpah ni”hong ci uh hi. Tua ahihciang in lawp mahmah na leh ngiimna hoih tawh nasep akipan uh hi.” Neh. 2:18

Ngiima:

ð  Thukizakna a ol-deuhna ding, ………………………………E-mail: lunmual@gmail.com

ð  Muhna leh theihna akantohna ding,…………………………..http://lunmual.blog.com

ð  Kipum khat in nasep khop thei na ding.

Dear Sanggamte aw,

                Lunmual thu kizakna “LUNMUAL NET” pan Shalom Nopna Thupha  na ngah ta un ci’n Editorials min tawh kong hopih masa uh hi. Lunmual Net cih pen Lunmual leitang tung aa om Lunmual khua unau sanggamte ban ah mun tuamtuam aa om Lunmual vontawite khempeuh ahuamkim Thukizakna khat ahihi. Hun khat lai khangmasa Tuanpupate in Nopni, dah nite ah tukhawm khawlkhawm in nuamsa uh aa, tuhunciang in nuntakzondaan leh pilsindaan tuamtuam huhau in sak leh khang kawm khangthakte Tuipi gaal khat dong ah kipai ta mah leh Lunmualte mah hong kici veve hi. Tedim, Kalaymyo, Tahan, Yangon leh Gamdang omte zong Lunmualte mah hong kici veve a, Ei leh ei ih kitheih mah bang in midang te’n zong Lunmual mah in hong ciamteh uh ahihteh Tuanpupate lutang phuumna Lunmual leitang a ithuaizia hong hilhden lai uh cihna ahihi. Mikim in khua neiciat a, Khuapi omzo khempeuh in zong khualui mah neiciat uh hi. Beh leh Phung u leh naute teen na, khangmasate luguh kikholna mun pen thu ngaihsuntheite in Itna lungsim nei hamtang in akhantoh ding uh kideihsak tek hi. Zomi khat hihna tawh Zogam Itna lungsim anei khangthakte in eimau' khua ciat pan nahoih sep ding hanciamkhop theih hun hi ta hi. Lunmual khua leh Lunmualte khantohding adeihsak khempeuh tung ah Topa' Nopna Thupha hong tung tahen.

Khris sung ah nasepkhoppih:   _JoshuaThang, Th.M (tlmangpu@gmail.com)

LUNMUALTE ANTAN THUNGET

                Lunmual khua aa om Pasian’ nasemte in thu kikupkhopna April 14 in nei uh a, gamsung, gampua aa om Lunmual Vontawite aa’ding, Gam aa’ding in Thungetna kha khat sung ah adee ni 1 ni ta in Antan Thungetkhopna neih ding thukim in akhensat mah bang un May Ni 1 ni Thunget kipan ding hi pah hi. Hih thu tawh kisai in Lunmual khua sung aa omte hitaleh, muntuamtuam aa om Lunmualte khempeuh in omna ciat pan in Gam leh Minam khantohna ding Thu ngeenciat ni. “Ka Gam uh hong damsak in” 2Khang. 7:14 sim in Thungen ciat ni. Apaizonailote’n zong eimau’ omna ciat pan thunget ding kiphawksak nuam hang. Khangnote kimuhkhopna leh Lunmual Community Development vai kikupna zong kinei nuam hi.

KHUA LEH TUI KHANTOHNA DING

                                                                                    Rev. Suan Khua En, B.RE,MBS;MA(Theo) GBC, Tedim

A tung aa thu bulphuh ommah bang in Lunmual khua leh tui Ulehnau akuamapeuh Pasian in Thupha hongpia a, I gam cidam in ih khantoh theihna ding in amasa pen Pasian sung ah nungta in kilam aa, amai ah ih kuunding thupi masa pen hi. Pasian muhna leh telna sung ah I nuntak ding thupi masa pen hi. Thubulphuh  LST I ettakciang-in Jerusalem Kulhpi kisiatna thu hi a, I theihkimsa zong ahihi. Nehemiah in hih thu atheih takciang in a Lungtang sung hong sukhalua mahmah ahihman in omthei nawnlo hi. Tuni in nang leh kei zong akhangtolo, akisia ikhua itui; I gam, ileitang veina lianpi nei in ih Lungsim hong sukkhaktek ding thupi hi. Akisiacip Kulhpi ciankhopding vaihawmna leh geelnate Nehemiah tungtawn in ahong vaihawm takciang un mikim in zong: 1. Veina Lianpi, 2. Ngiimna leh tupna hoih; 3. Lawp mahmahna tawh nasep kipan uhi. Kulhpi pen ni 52 sung in nuamtak in zoziau uhi. Hih thu I et takciang in:

1.       Antang in Thu angetna uh kimu thei hi.

2.       Lungsim kipumkhatna nei uhi.

3.       Semkhawm in mapangkhawm thei uhi.

4.       Mihingtha bek hilo in Topa’ tha tawh alamzo ahihna uh kimuthei hi.

Tua mahbang in Eite zong Israelte bang in akisia, adamlo; akhangtonailo khua le tui veina lianpi nei in I vekpi in ah:

a.       Pasian’ mai ah kuun in antang aa thu I ngetkhop theih ding,

b.       Lungsim kipum khat aa khut kileen aa ih sepkhop ding;

c.        Gen bek lo in I vaihawm thute ihsepkhopna takpi leh Topa’n hong lungkimpih in hong panpih ding aa, akisiasa, khua leh tui, gam leh lei; mimal nuntakna dong ah khangto in picinlam ih manawh taktak ding hi. Topa’n mimal kim Thupha hong piaciat ta hen.

LUNMUAL INN SAZIAN:

Lunmual(Inn 84), Tedim(Inn 35); Heilei(Inn 1), Tahan(Inn 10); Kawlpi dungsuk(Inn 8?), Sakhangyi(Inn 4); Hakha(Inn 1), Singgial( Inn 1); Pyidawtha(Inn 2), Tamu(Inn 2), Saihkheen(Inn 3); Letpanchaung(Inn 1), Chantaji(Inn 2); Cikha(Inn 1), Daakdung munlai(Inn 2); Yangon(Inn 7), New Champhai(Inn 3); Munluah(Inn 2), Muizawl(Inn 1), Aizawl(Inn 1); Pwintphu(Inn 1) leh Gamdang omte: Malay(Innkuan 5 leh mimal 20 val), Singapore(Numei 1); UAE(Mimal 1), USA( Nupa kop 4 & mimal 2); Denmark(Innkuan 1), Canada( Nupa 1); Bangalore Sangkah(Mimal 3), Pune ah Sangkah mimal 3.

Simcard Kingah nailo!!!

            President TheinSein in April 24 in WCDMA Simcard 1 pen Ks. 1500 in Kawlgam bup leitheihding’n thugingsak zo napi’n Phone Receiver/Signal Tower hong kibulhsak nailo deuh uh ahihman in Tedim-Tonzang in lam-etna lianpi tawh mualmong ki en cieciailai hiveen!

Kawl Sathau & Daidawng gahte Lauhuaina: US President Barak Obama leh Missippi State MP Roger Wicker kipuak laikhak ah guza kihel cihthu pen FBI thukante in mukhiapah uh a, gulehna ding aompaklo Kawlsathau gahte pan kibawl guza(Racin) nam 1 ci uhi. Gu khat pepeuh anekha aomciang in Sathau kipia leh damthei napi’n Kawlsathau leh Daidawng tangte pen sathau nam hipah ahihman in gu-lehna ding haksathei hih tuak hi. Eikiang aa om Daidawng leh Kawlsathau gahte zong a lauhuai gige ahihzia phawkhuai pah ding hi.    

LUNMUALNET pan DAHPIHNA: Abeisa hunte ah apaisa Lunmual Vontawite khempeuh hang in dahpihna thu I pulaak hi. AD.2012 Christmas zingsang in Pa NengKhenPau(Kum58) in anasepna Tachileik pan hong nusia sese, 2013 January in hong nusia Nu CiangEn,B.Min (EBC Pastor Innkuan) leh Lia. ManSianDeihHuai; April 15 in hong nusia Tg.SuanBiakLal cihte hang in LUNMUALNET pan DAHPIHNA thupuak hang.

LUNMUALNET pan LUNGDAMPIHNA:

Sangnaupangte Laivuan Result suah “HoihKim” ahihman in ki lungdam mahmah a, Tedim Sangkah zong kibehlap zeel lungdamhuai hi. Khanglam sangkah hongciahpawl zong paipai ta uh a, University of Medicine ah Siavuan sinmasa pen Tg. NginThanSang zong Sang paikikta ahihman in LUNMUALNET pan kilungdampih mahmah hi.

Tulai Thuthang:Cycle Speed hattak hawl leng nuampeuhmah aa; banglo khat hileng HIV/AIDS khawng sang manlang zaw, Cycle hatlua aihteh Lampaite’n lukhu khudi khuzaw bilbel un peuh cikhong! Bangcih di, Heih!

Thuthak: June 5-9 sung in Tedim Khuapi ah Zomi Tuailai khawmpi omding ahihman in a tamtheithei in minpia in kihelsawmciat tek ni. Zomi Innkuan Singapore pan Neek leh Dawn hongsikh ding uh kici hi. FM Radio naleng hong nuam uh kici lai hi. Minpia mengmeng ni. Eimau teekteek kihelna in Thusinna tawh mapangsam lo diam?

TATE MABAN DING NGAIHSUTSAK HUAI: Biakna nasem ding in ihdeihsak diak teng pen RC Phongjite Sangkahsakdaan bang mah in Biakna Sang mah ah kahsak pah huai mah aa, amau’ utna bangbang teel theilel diin I deihsak teng pen Kumpi sang mah ah kahsak huai lel lo ding hiam? Transfer Script oltak akingahtheih mateng!   

KHUAHUN KIKHEEL NISA LUA!

                                                                                                                                        Sia ThangNgaihDal, BA(His) GRET, CORA, Tedim

I teenna hih Leitung pen nisa mahmah ta hi. Bang hang ni hizah in sa hiam cih leh Singkung kitamphuuklua hi. Tua singkungte pan in Leitung a tuam Meiineel huihvot{Ozone}te pen singkung akiphuukteh sanawnlo in nisa khauhtak in hong kaapteh salua mahmah ta ci’n kimu khia hi. Hih leitung salua pen avoykik theih na ding in Leitungbup mipilte kikupna America gam NewYork khuapi ah kinei hi. Singkung lopate phuuklo, haallo in suanbeh ding kisam ci uh hi. Hih thu akitheihna ding in Radio, TV, Tadensate ah taangko uhi. Singkung lopate suanbeh leng ateh ahiangte in leihoih piangsak hi. Atehpan in Sun lam in huihsiangtho(Oxigen) lawnkhiathei hi. Idiik huihsiangthote inaak pan idiikteh tua huihsiangtho tawh isisan: ilungtang ah kimu in ih sisan pen sawp siang theilai hi. I khua I gamciat ah singkung lopa suanbeh in gamhaal lo in abawlpa Pasian I iit leh abawlsa singkunglopate I iitding ahihi. Singkung isuanciang in izattheih Ngaingaw, Cingh sing; Sing La, Dol; Taaksing, Pinta cihte ban ah Ankungte aading eeklei apiangsakthei “Be Innkuan” (Begaap tawh akibang singkungte) isuantheihding thupi hi. Gtn: Vangh sing, Sing ngii; Khuum, Japan Zawngtah; Zawngtah, Caurindra cihte suan ding thupi hi. I lote ah zong Benamte leh Be Innkuan Singkung namte suanlehang, Vanpan in Kekkia, Khuaphiatna pan aa huihlak ah ahongkia eekleihoih dat Nitrogente pen hih benamkungte in keem in akiim apaam aa om ankungte zong tua eekleidat(Nitrigen) hawmsawnthei lai in anhoihsak ahihman in ih lote ah Be Innkuankungte ihciin ding Thupi mahmah hi. Mailam ah Singkungtampi asuante Dollar sum kipia ding cihthu zong kiza hi. Lunmual gam ah zong Singkung suan ni 1 ciamteh in ihsuan ding zong kisam hi.

KIPUMKHATNA

                                                                                                            Sia Do Za Thang, B.Econ, M.Div

                                                                           Leitung ah minam tampi ki om in Ei Zomite zong ciaptehna angahte ihihi.

Zomite sung mah ah zong a namtuamtuam in ikikhenlai hi. Tuabang nam sung ah a khangto leh gualtungtuang zawdeuhte i-etciang in akipumkhatte leh a kithutuakzaw zek teng mah na khangto pah uhi. Kawlte paunak khat ah Bawngte kithehthaang leh Sahang in petlum ci uhi. Ei paunak ah zong Nupa kilungtuak, Khua 1 in zo lo. Khua 1 kilungtuak khua 9 in zolo  ci’n ipu ipate in nag en uhi. Mite’n hongsimmawh in hong netniam zawhlohna ding in akisam pen in kipumkhatna mah ahihi. Sepna bawlna ah mi khat sep ding mi 2 in sem leng kizobaih zaw in zong kitelhzaw hi. Nasep khat pepeuh ihzawh theihna ding in semkhawm bawlkhawm leng mite in hong nopneh zonawnlo ding uhi. Khat leh khat kizahtaak in kithupi bawl leng midangte in hong thupi bawl thei pan ding hi. Ei leh ei mah kithupi ngaihsut in kipahtawisiam leng midangte in zong hong simmawhngamlo in hong pahtawi pan ding uhi. Sepna bawlna khat pepeuh ah kipanpih ciat leng nasep lel leh micimawhlua cih hong tawm in ih khuasung hong nuam mahmah ding hi. Hazatna lungsim leh duhhopna, huaihamna lungsimte paaikhia in kipum khat in nasemkhawm leng I khua I tui hong khangto in I minam sung ah kilemna, I gamsung ah daihna hong omthei pan ding hi. Leitung lam kipawlna leh Biakna lam kipawlna pawl khat I etciang in akhantoh sang in akiamsuk tamzaw ta hi. Bang hang in kiamsuk uh cih I etciang in tua kipawlna sung ah kithutuahna omlo in ei’ thu tek in I ngalkhaat tat ihihman in tuabang kipawlna pen sauvei kikhomlo in a beimang tamzaw hi. Tua ahihman in kipawlna kician I neihtheihna ding in “KIPUMKHATNA” tawh ma anawttheite ihihkimciat theihna ding in Topa’n Thupha hong pia ta hen.

KIZOPNA DING:

·         Lunmual khua Pawlpi kim ah Siate leh Makaite, Khuasung khantohna ding Hausate leh makaite,

·         Articles & News: Laipuakna ding Adventist Store: Pa Mang & Nu Hau(Lawibual+Myoma), Tedim.

·         Rev. SuanKhuaEn(Myoma), Lawibual: Sia DoThang, Sia ThangNgaihDal; Leilum: JoshuaThang

·         Tahan, Kalaymyo: Pa ThangZaSuan

·         Yangon: Rev. ZamThanLian & Rev. ChinKhanKham

Lungdamna:

ð  LUNMUALNET Hawm masa pen hongsik Sia ThangNgaihDalte Innkuan(Ks.5000).

ð  Blank Paper Realm 1 hongpiakhia Rev. SuanKhuaEnte Innkuan.

ð  Laikhetna ding Meitha kisamteng kicingtak hong zatsak ban ah Niangtui limtak hong awwm Pa LianZaVaite Innkuan.

ð  Laikhetna ah hihtheih bangbang in hong khetsak: JoshuaThang.

·         Articles & News kipuak thei den hi. (khuavak@gmail.com, lunmual@gmail.com)

·         LUNMUALNET HAWM (2)na asiknuam aomleh Lungdamtak kisangpah ding hi.

·         E-mail leh Phone Numbat zong kitheinuam hi.

·         Thu tuamtuam leh Cidamna lamsang theihhuaithute hong puak un.

·         Ngaihsutpiakna leh Khantohna ding nasemnuamte.

Theihhuai kiukiu:

1. Mualzawl khuasat Kum………………………………….1869
2. Kangkaan, Tuimu & Vomkua…..……………………….1893
3. Lunmual khuasat Kum…………..……………………….1896

Editorial Comitees: 1. Rev. SuanKhuaEn, 2. Sia ThangNgaihDal; 3. Sia DoZaThang, 4. Pa LianZaVai; 5. Pa ThuamSuanMang, 6. Lunmual Khua Pawlpikeem Siateng leh gamsung, gampua aa om Lunmual Khua Khantohna ding adeih khempeuh, 7. JoshuaThang, 8. Tg. DamKhanMung.

Email:  lunmual@gmail.com; http://lunmual.blog.com